#飯團第一屆實習生分享 🌟#Sea
本來就係抱著試下先算嘅心態參加一舊飯團嘅實習，到我經歷完星星沒有忘記on show嗰三日，我真係好慶幸我當時有咁認真去填份申請表。即使認識唔深，見得唔密，參加過嘅活動唔多，我都感受到劇團嘅每一位對劇場嘅愛，對我哋嘅包容同友善。
實習未開始，Alysa問我拎左張相。我心諗：咦咩都未開始拎我張相黎做咩？放係片？咩片啊…直至星星沒有忘記劇終前嘅最後一首歌，噢我見到啦。第一日參加實習，就見到自己原來已經被當係一份子嘅感覺好感動，冇諗過自己只係「工作人員」「前台派飛嗰個」都可以成為production嘅一份子。
「香港戲劇經已死，死左都冇咩人理，多麼可悲」（唔記得確實歌詞但應該差不多，錯左跪求唔好鬧我嗚嗚嗚），老細一開始唱呢首歌，我就開始喊，又笑又喊。自開始接觸不同劇場人開始，就已經聽過無數次「喺香港做劇場等同乞食」嘅說法。我唔了解市場唔知點先可以令劇場可以有更多人鍾意，不得不說作為尚未投身社會嘅細路，經常性對以後嘅路覺得好驚好驚：我到底以後仲可唔可以做到呢行？如果我選擇繼續做劇場嘅工作會點？係咪真係要好似前輩所講咁食唔起飯？香港以後仲需要我呢啲人嗎？我好鍾意戲劇，好鍾意表演，但呢種鍾意一直都被認為只係停留係興趣嘅層面，被人覺得係不必要嘅嘢。睇完《星星》，我有一種被安慰嘅感覺、被鼓勵嘅感覺。即使冇人理，冇人想知我係邊個，但原來呢條路有好多人同我一樣㗎，有好多人都為自己嘅「興趣」努力緊。
雖然都係唔知以後會點，但至少我冇咁驚啦。
— Sea
——-
#感謝支持 #全院滿座
🌟女生獨腳戲 《我們很快樂》 八度公演🌟
「假如快樂是一隻蝴蝶，它還好嗎？」
編、導、演：林珍真
24-26/ 09/ 2021 8:00pm
25-26/ 09/ 2021 3:00 pm
香港藝術中心壽臣劇院
詳情： https://www.riceballer.com/happiness
2021， 再一次，選擇快樂✨
Search